lun

21

dic

2015

Resumen temporada 2015. Actuaciones. 

¡Mui bones a tol mundu! Esti añu, entre una cosa y otra tuvimos bien d'ocupaos con munches actuaciones y proyeutos, polo que tamos mui contentos. Poro, nun topamos momentu pa sentanos con calma a contávoslo hasta agora, asina qu'allá vamos.

LaKadarma nel FIL 2015
LaKadarma nel FIL 2015

Agora qu'acabamos l'añu ye'l momentu d'echar la vista atrás y facer cuenta de la esbilla d'actuaciones y eventos nos que LaKadarma tomó parte.

Dende equí queremos agradecer a toles comisiones, ayuntamientos y entidaes qu'ufren a LaKadarma la posibilidá d'amosar el so trabayu. A toos ellos ¡MUNCHES GRACIES!

 

MAYU

 

XUNU

 

XUNETU

 

AGOSTU

 

SETIEMBRE

 

OCHOBRE

  • Homenaxe a Los Berrones (Tolivia, Llaviana).
  • Proyección "LaKadarma nel Festival Intercélticu de Lorient" (Nava)
  • XLIV Festival de l'Ablana (L'Infiestu, Piloña).
  • I Alcuentru Folclóricu n'Ayer (Morea, Ayer).

 

PAYARES

  • XXV Festival de La Castaña (Les Arriondes, Parres).
  • Festival RefuFest, en solidaridá colos refuxaos sirios (Nava).

 

AVIENTU

  • Collaboración col Mercáu Navideñu (Nava).
  • Collaboración nel II Tornéu TINFUSAM, entamáu pol C.D. SAMO AFESA FEAFES ASTURIES (Les Arriondes, Parres).

 

1 comentarios

mar

04

ago

2015

Campaña de promoción del comerciu llocal - Collaboradores 2015

Equí tenéis tolos establecimientos que collaboren na campaña de promoción del comerciu llocal 2015, entamada por la A.F. La Flor del Pumar y la B.G. LaKadarma.

MUNCHÍSIMES GRACIES a to@s por apoyanos nos nuestros proyeutos, ye un auténticu luxu sentise arropaos pola xente de Nava (y dalgún collaciu d'otros conceyos!!)

0 comentarios

jue

16

abr

2015

Entamu temporada 2015

Bones, Kadarmeros!! Como veríeis, llevamos varios meses cola web un pocu parada pero yá tamos equí de nuevu llistos pa dar guerra!


Tamos a les puertes d'una nueva temporada d'actuaciones, con mogollón de novedaes y sorpreses que diremos contándovos pocu a pocu.

La primer actuación de la temporada sedrá'l XXXVI Descensu del Ríu Piloña, onde taremos animando'l desfile folclóricu previu a la carrera. Préstanos muncho tar ellí ya que, como sabéis, munchos de los componentes de la banda son de Piloña, colo qu'ésta vien a ser una segunda casa pa LaKadarma.

L'entamu del desfile ta previstu pa les 15:45 na estación de Feve de L'Infiestu.


Amás, el sábadu vamos presentar dalgún componente nuevu... ¿queréis saber quién? 


Nesti inviernu, amás, participamos cola nuestra versión de la BSO de Xuegu de Tronos nel CD qu'espublizó l'Espaciu La Llegra como recompensa pa les persones que participaren nel crowfounding #AbriendoEspaciu que fexo posible l'entamu de l'andadura del llocal.

Nesti CD participen tamién grupos y artistes de la talla de Dixebra, Skama la Rede, Zea Mays, La Tarrancha, Xera, Fe de Ratas, Algamar Producciones, Silvia Quesada, Filanda, K-Nalón, Vrienden, ON, Desakato, Skakeitan, LØV, Soncai System y Skontra.

Casi ná, cucos!!

Per otru llau, yá tamos ultimando tou pa les III Xornaes de Música Tradicional de Nava. Dientro pocu vos diremos dando anuncia de tolo relacionao con elles nel blog que facemos pa la ocasión.

Namás vos adelantamos qu'esti añu vamos tener unos conciertos espectaculares y que namás van poder ser vistos en Nava... Nos nun nos lo vamos perder, ta claro, ¿y vosotros?

 

¿Paezvos poca cosa? Pos nun vos queda nada... arrancamos!!!

0 comentarios

mar

23

dic

2014

ElKalendar 2015

Por Leti Cernuda

Esti ya’l Kalendariu del año pasao:

La idea ya una representación de “La última cena” de Leonardo Da Vinci ya naceo na Naveta, cola cerveza/colacao de dempués del ensayo. Queríamos facelo ehí mesmo, nel nueso barín de siempre, pero… ¿cóumo metía yo a toos estos venaos xuntos nun sitiu tan pequeno? Imposible.

L.levéilos pal l.lagar de Lolina ya ehí nos coloucamos toos. Col gran angular que me dexó’l mio boun amigo Román Joglar, yá nun había problema nengún. Bueno… que nun paraban de riíse.

 

¿Ya entós el foundo? Alégrome que me faigáis esa entruga. El foundo ya una composición de las parés del Bar La Naveta. Saquéi dellas foutos, pa finar una panorámica de seis. Así foi nun entamu:

Eso foi lo más difícil, facer que coincidieran las parés cola illuminación ya la perspectiva. Uséi la mesma velocidá, diafragma ya ISO pa tolas foutos, pero claro, siempre pue variar un puquiñin. Lo más importante pa estas foutos d’interiores yera que la cámara tuviera paralela a la paré, pa que nun se me fugaran las llinias verticales ya quedaran rectas, porque al usar l’oxetivo gran angular, las líneas tienden a xuntase si’l sensor de la cámara nun ta paralelo a la paré. L.luéu selecionalos a el.los ya ponelos enriba de las paredes de La Naveta, foi pan comío.

 

Outro dato a dicir d’esti Kalendariu ya qu’hubo xente que’l díi de facer la fouto nun puodo vinir. El nueso Yisus perdonolos, ya tuvi qu’acabar poniéndolos a caún nun cuadru de los que tan colgaos na paré. Agora sí que tábamos toos. (Pa ver las foutos, veite a la seición de semeyas).

Nun séi qué vos paecería este kalendariu; nós quedamos percontentos pero cola sensación de que teníamos el llistón mui altu pal prósimu kalendariu. Teníamos dalguna idea ya escoyimos ser unos mafiosos. ¡Ya vaya si lo paecemos!

 

Esta vez lo que me costó foi xuntalos a toos a la mesma hora. Yeran exteriores y yo necesitaba l.luz del Sol y dalgunos trabayaban, así que feixe cuatro grupos ún d’ellos n’interior. Las cuatro composiciones ocurriérouseme viando “El Padrino” ya la serie de “Los Soprano”. Nesta entrada nun veréis las fotos oficiales, así esperáislas con más gana :P

Entós, xuntámonos el díi 2 de Payares, ya la primera d’ellas foi ceo, a las 12 el mediodía, faciendo presentación del coche oficial de LaKadarma. Nél tan pousando pa mi: Llore, Andre “Mazas”, Xuacu, Bea ya Varino.

 Dempués de comer pusímonos cola segunda fouto. Nun principio diba ser na plaza de Nava, pero emprincipió a l.lover ya movímonos pa las afueras de Nava, y foi una l.loucalización perfeuta. Nesta sal: Isa “Geme”, Carolina “Cardes”, Duardo, Isa “Presi”, Teban, Leti, Andre Joglar ya César, faciendo de másimos mafiosos.


El plano de la tercera, ocurrióuseme la nouche anterior enantes dormir. Sí, de verdá. Tengo que agradecé-y muncho a Carolina, que la probe aguantó como una campeona la so pose. Nesta fouto nun séi qué será meyor, si’l peinao de Pastrana o’l bigotín de Rodri… el caso ya que toos son protagonistas ya el.lous son: Pastrana, Rodri, Laura, Barronos, Noelia ya las patas de Carolina.


Ya la cuarta ya última, tolos mafiosos xuegan al póker (o debieran) así que nós non somos pa menos, ya eiquí tan: María “Lloria”, Jenny, Yago, Bor ya las manos de Xuacu. Son tan tramposos que nin beben alcohol, nin hai fumu, pero hai que querelos abondo. Coumo Borja “Yemina” tenía les sos prioridaes col trabayu de fin de carrera ya Paula anda colos italianos, tuvi que ponelos como pudi nun marco.

Pos en breves tendremos los kalendarios nas manos pa dir dándovoslos a toos. Sóulo espero que vos guste y que lo veáis con bounos güeyinos.

Quédame agradecer el gran apoyo que tuvi organizándoulo too. A Román Joglar por dexame una vez más l’equipo con calidá. Al bar Florida por dexanos esa esquinina pa facer maldaes. Ya tolos mis compañeros de LaKadarma que collaboraron, fuaron puntuales ya siempre fan por pasalo pipa.


Graasias.



1 comentarios

dom

03

ago

2014

Actuaciones branu 2014

LaKadarma

Buenes a to@s, como yá sabréis los que nos sigáis al traviés de facebook, llevamos un par de meses de trabayu importante tocando n'eventos de diferente calter y nun tenemos tiempu pa sentanos a contávoslo. Güei que ye domingu, como nun somos nosotros mui de santificar les fiestes, vamos da-y un pocu al tecláu p'actualizar la seición y ponevos al tantu de lo que ficimos y de lo que fadremos esta temporaduca.

 

Actuaciones en Nava

Cartel del XXXVII Festival de la Sidra de Nava
Cartel del XXXVII Festival de la Sidra de Nava

En primer llugar, ufrímosvos un resumín de les nueses actuaciones en casa. Una bona parte del trabayu de LaKadarma desendólcase en Nava, como nun podría ser d'otra manera, seya collaborando con asociaciones y diferentes colectivos o al traviés del nuestru conveniu añal col Conceyu de Nava.

 

Dientro de la primera xera d'actuaciones tuvimos collaborando cola Asociación HostelNava nes XXVII Xornaes Gastronómiques de los Platos a la Sidra y cola Escuela Municipal de Música de Nava na organización y na entrega del I Premiu de Percusión Manegueru de Paraes. Dientro del conveniu col Conceyu de Nava actuamos nel I Gran Capítulu de la Bona Cofradía de los Siceratores d'Asturies, les fiestes de San Xuan, El XXXVII Festival de la Sidra y'l Día de Nava nel Festival Arcu Atlánticu.

 

Amás d'ello, el próximu 23 d'agostu taremos participando nel Festival Folclóricu de Nava, qu'entama'l grupu folclóricu La Flor del Pumar dientro del marcu de les fiestes de San Bartolu.

 

Fiestes

Fiestes de Santana en Madiéu
Fiestes de Santana en Madiéu

Otra estaya importante d'actuaciones son les fiestes de pueblu, como solemos decir los gaiteros, en formatu estándar "misa-procesión-vermú".

 

Hasta la fecha tocamos nes siguientes fiestes:

Fiestes de Nuestra Señora de Loreto (Colunga)

Fiestes del Carmen n'Arboleya (Cabranes)

Fiestes de Santa María Magdalena en Valle (Piloña)

Fiestes de Santana en Madiéu (Cabranes)

 

Merez mención especial nesti apartáu, anque nun seya una fiesta patronal, la boda d'unos bonos collacios de nueso, Jose Luís Remis y Ana García. Gracies pol tratu fenomenal que nos disteis.

 

El próximu 15 d'agostu taremos nes Fiestes de Nuestra Señora de Fresnéu (Cabranes) y'l día 31, nes Fiestes de La Guía en Llanes.

 

Festivales

Alcuentru de Bandes de Gaites Arcu Atlánticu
Alcuentru de Bandes de Gaites Arcu Atlánticu

Los Festivales de Bandes de Gaites úfrennos la posibilidá de desendolcar el repertoriu de la Banda nun formatu de conciertu n'escenariu, creando espacios que, na nuestra opinión, son los más afayadizos pa una agrupación musical.

Esti añu tuvimos en dos Festivales d'esti tipu:

El X Alcuentru de Bandes de Gaites de Castrillón, entamáu pola Banda de Gaites L'Alborecer y l'Alcuentru de Bandes de Gaites Arcu Atlánticu en Xixón.

 

Amás, el próximu 16 d'agostu taremos en Llanes nel Alcuentru de Bandes de Gaites qu'entama'l Bandu de San Roque pa les fiestes homónimes.

 

Conciertos

 

Pa finar, damos anuncia de la nuestra collaboración nel estrenu de la obra "Asturias, Sinfonía Natural", compuesta por Juan Carlos Casimiro, qu'allugaráse el próximu sábadu 9 d'agostu a les 20:30 hores nel Teatru de La Llaboral.

Trátase d'una obra compuesta pa orquesta sinfónica, coros de voces blanques, banda de gaites, soprano y dos gaites solistes, que n'esta ocasión sedrá la nuestra directora Andrea Joglar y Flavio Benito, mayestru de gran parte de los componentes de LaKadarma. Consta de los movimientos "Obertura", Fantasía minera", "Lamento por la ausencia" y "Canción a la tierra", que recreen conceptos asturianos y universales como la mar, la mina, l'amor a la tierra y la muerte.

 

Tamién participarán nel conciertu los collacios de la Banda de Gaites "Villa y Condáu de Noreña".

 

Pa nós ye una oportunidá única de tocar con una orquesta sinfónica y de xuru vamos esfrutar abondo cola esperiencia.

 

Podéis mercar les entraes equí.

 

0 comentarios