¿Qué ye LaKadarma?

LaKadarma ye un nuevu proyeutu musical que porfia pol desendolcu de la música tradicional asturiana apurriendo-y nueves sonoridaes y arreglos a la gaita asturiana recibiendo pa ello influencies de distintos estilos.

 

L'agrupación, que se forma'n febreru de 2012 baxo la direición musical de los hermanos Rodrigo y Andrea Joglar, compónse de músicos procedentes d'estremaes estayes de la música tradicional asturiana, tanto del mundu de les bandes de gaites, como de los grupos de música folk, amás de gaiteros solistes o escolinos de la Escuela Municipal de Música de Nava.

 

Nes sos actuaciones, LaKadarma trata d'ufrir un espectáculu desenfadáu, espontáneo y dinámicu, al traviés d'un repertoriu compuestu de pieces de composición tanto d'autores destacaos del panorama musical asturianu como de los propios direutores de la banda, amás de pieces tradicionales o adautaciones de melodíes contemporánees.

 

Los sos ensayos allúguense nos llocales sociales qu'el Ayuntamientu de Nava tien nel Llagar de Sorribes, na capital naveta.

¿Qué instrumentos usa?

LaKadarma emplega gaites asturianes d’un roncón afinaes en Do y un cuerpu de percusión formáu por caxes d'alta tensión, timbales y bombu, anque tamién usa dacuando otros instrumentos de percusión como'l caxón flamencu, tambor asturianu o batería.

Rescampla tamién l’enfotu de l’agrupación por explotar al máximu les posibilidaes musicales de la gaita asturiana, siendo la primer banda de gaites d’Asturies n’usar punteros afinaos na tonalidá de Sol, amás de roncones en diferentes afinaciones.

 

Nesti sen, LaKadarma pretende seguir una llínea de trabayu na que se porfie pola investigación y el desendolcu de la gaita collaborando con varios talleres de luthería del país y de la so contorna na preba de posibles innovaciones que permitan algamar los meyores resultaos a nivel musical.

Indumentaria

LaKadarma vístese con traxes tradicionales asturianos, basaos en reproducciones de los emplegaos nel país nel sieglu XIX y ellaboraos con materiales naturales.

Amás d’ello, la banda dispón d’una indumentaria non tradicional pa actuaciones que nun requieran l’usu del traxe asturianu.