Dempués d’unes cuantes décades de recuperación y dignificación de la música tradicional y, más en concreto de la gaita, inda alcontramos les reserves y’l refugu d’una parte de la sociedá asturiana. Esa gaita, qu’evolucionó de forma esponencial gracies al esfuerzu en xuntanza d’intérpretes, luthiers y otros estudiosos del instrumentu, tovía s’esfrona énte los prexuicios y la poca conocencia.

Pue ser qu’esi fechu moviere a los gaiteros a centrase na “execución” de les pieces, ameyorando la téunica de forma bultable.

Igual foi nesi procesu onde se perdió l’interés pola “interpretación” de les pieces, dándo-y a la melodía executada daqué de vida, de sentimientu, de tresmisibilidá.

Esta facultá de tresmitir mentanto tocaben teníenla, por ciertu, los bonos gaiteros vieyos, magar que la so teúnica (execución) fuere delles vegaes precaria.

El pruyimientu de LaKadarma ye, dende la so fundación, desendolcar la parte interpretativa de la música ensin renunciar a los avances téunicos y d’execución algamaos nestos años.

“Nun paecéis una banda de gaites” ye un comentariu que dacuando sal del nuestru públicu. El so sen pue ser ambiguu y dexa implícites munches creencies vieyes (de les que dicía al entamu), pero bien entendida nun dexa de ser un afalagu de los grandes. Ye como dicir que la gaita Asturias sal del ghetto; yá compite n’igualdá con otros estilos, con otros instrumentos, con otres agrupaciones.

Esa interpretación que paez que marca les diferencies pue deprendese d’otros músicos. Pero les referencies primeres siempre van tar nes artes escéniques, nel teatru, nel cine.

Tenemos la suerte de cuntar dientro del ámbitu interpretativu asturianu con una actriz d’abonda experiencia y carrera consolidada qu’amás amuesa una fonda sensibilidá cola cultura asturiana y la so problemática social d’evolución (yá) cuasi crónica.

A ver qué nos quier dicir.

 

Y... ¿díxivos que ye gaitera?   

-Alcuéntreste agora fuera d’Asturies. ¿Qué tal t’afayes n’América? ¿Alcuentres diferencies na manera de vivir nos Estaos Xuníos?

   Torné hai yá un mes pero taba encantada ellí, la verdá. Fui pa deprender inglés nuna escuela y pa garrar fuerza y ganes de lluchar, que dempués de más d'un añu ensin trabayu teníales escaecíes. La vida en Los Ánxeles, que ye onde yo taba, ye perdistinta, sobremanera no social. Ellí nun pues quedar pa tomar dalgo nun peacín, tienes que facer planes pa la otra selmana, porque les distancies son enormes y el coche ye imprescindible. Nun hai terraces onde tomar dalgo y amás, tomar dalgo ye mui caro. Pero bono, teníamos un grupín d'amigos colos que díbamos a la playa, a la piscina, a xugar a volley o facíamos barbacoes. Na mente tengo tornar en cuanto pueda p’ameyorar l’inglés.

 

-¿Cuálos son los tos proyeutos actuales o próximos?

   Agora toi grabando una serie nueva de Bambú p’Antena3, que se llama "Bajo sospecha". Y los proyeutos futuros tán toos na tierrina, tengo un par de películes, una n'asturianu que se llama "Les manes" y otra alrodiu la minería que se llama "Enterrados". Pero como casi too, tamos esperando p’axuntar les perres pa poder faceles.

 

-Si te dexen escoyer, ¿prefieres cine o teatru?

  Yo siempre digo que soi más de teatru pero a la fin too depende del proyectu que t'ufierten y de les perres que tengas na cuenta corriente.

 

-Pa llegar hasta equí, pasasti años de trabayu duru. ¿Cómo foron los tos anicios na profesión? ¿Foi difícil entrar nel circuitu?

   Yo siempre digo que soi mui afortunada, lo que nun quier dicir que nun lo trabayara, pero hai de tar nel sitiu y nel momentu precisu. Finé la carrera d'arte dramáticu y saliéronme dos trabayos qu'ayudaron a tolo demás. Un Estudio1 que fizo posible'l casting de Las trece rosas y una llamada de Luis San Narciso pa facer SMS. Dende entós puedo manteneme del trabayu d'actriz, a vegaes meyor  y a vegaes peor, pero vamos tirando.

 

-¿Hai dalgún papel que te marcare por demás na to carrera?

   Esa suerte nun la tuvi (rises), refiérome a tar nuna serie con un papel que suba de sutrucu la to carrera. Como dixi enantes, yo calténgome, pero nuna segunda o tercera o cuarta llínea, de la que nun me quexo, claro ta. Puedo dicivos un papel y una obra de teatru que marcaron la mio vida, Presas de Ernesto Caballero, el proyectu final de carrera que ficimos na RESAD. Yo facía d'una comunista y la obra yera sobre una cárcel de muyeres na Posguerra. Conocer esi momentu de la hestoria, per dambes partes, d'un mou tan ampliu pola documentación que teníemos de buscar, fizo que madurara, que formase lo qu’a día de güei ye la mio forma de ver la vida y que me diesen ganes de lluchar polo que creo.

 

-Por tratar un poco la situación d’Asturies: ¿crees que tendría futuru un cine asturianu (n’asturianu)? Dígolo porque paez que’l teatru ta más avanzáu nesi sen. Nun sé si tas d’alcuerdu.

   Sí, ye verdá que'l teatru tien muncho ganáu nesti sen, porque tien una tradición lliteraria que lo permite, pero creo que los dos tienen munchu camín delantre. El teatru tovía tien que salir del costumismu pa facer ver a la xente que l'asturianu ye igual de válidu n'otros estilos. Creaciones propies y tornes como la que se fixo del Lazarillo de Tormes, son un bon camín nel qu'hai que siguir semando. Col cine y la tele, la cosa ye más complicá, pero non imposible. El problema nun ye un futuru de ficción n'asturianu, el problema ye un futuru nel que la xente tea concienciada de que l’asturianu ye vehículu válidu pa cualesquier ámbitu.

 

-Nunca escondiste la to ideoloxía en materia sociocultural y política. ¿Crees qu’eso condiciona’l to trabayu?

    Yo cuando me metí nesto de la interpretación, naide me dixo que tenía que dexar les idees propies no referente a cualesquier cosa que nun tuviera que ver con ser actriz. Yo nun-y digo a naide cómo tien que pensar ni qué tien que facer, nin los xulgo porque nun piensen como yo, faltaría más, así que espero que naide lo faiga conmigo. A mí tamién m'afecten los recortes y les midíes que se tomen en tolos sentíos; mirar pa otru llau sedría una forma de vivir mui "fácil" que nun va conmigo. Nun creo que me condicione pal trabayu, pero si'l fechu de querer caltener la mio identidá y de quexame por coses que me paecen inxustes, ye motivu pa nun contratame, bien ta nun tener nada que ver con un proyeutu nel que lo que pienses pesa más que'l talentu.

 

-Dende’l to compromisu fuerte cola cultura asturiana, ¿cómo ves el nuestru “escenariu” particular nos últimos años?

    Creo que tol esfuerzu que se ta faciendo, que ye munchu, ta viéndose recompensáu mui pocu a pocu, pero tamién creo que l'ésitu en tolo referente al asturianu pasa, gústenos o non, por una palabra que ye la que nos estanca en tolos propósitos: oficialidá.

 

-Amás sabemos que tuvisti munchos años nun grupu de baille asturianu en  Mieres. Cuéntanos dalgo d’aquella época. ¿Y la gaita? ¿Cómo entamasti a tocar?

   Yo baillo dende piquiñina. Entamé col grupu de baille de Santa Cruz de Mieres, "Cruz de Mayo" y cuando se desfizo fui pa L'Artusu de Figareo. Ellí tuvi hasta que vini pa Madrid hai 13 años y agora, de xemes en cuando, voi baillar al del Centru Asturianu de Madrid. Lo de la gaita, vamos a esclarialo porque dame hasta vergoña que me lo preguntéis. Hai como 5 años entamé a dar clases de gaita en Madrid con Xuan Oliver, pero va como dos años que nun la toco, lo que quier dicir que lo tengo más qu'escaecío. Hai poco púnxime a tocala pa un casting que tenía, porque al mio representante dió-y por dicir que sabía tocala, y nun llegaba a más d'una mudanza ensin que se me durmieran los llabios. Tengo idea d'aprovechar esti branu de calor en Madrid pa volver a garrala y siguir les notes que me diera Xuacu Amieva a ver si adelanto un poco. Pero dame a mí qu'esto va ser como los propósitos d'añu nuevu.

 

-Cuando ves les actuaciones de grupos de música asturiana, ¿eches en falta más cuidáu na interpretación enriba l’escenariu? Nesi casu, ¿qué cambiaríes?

   Ye verdá que la puesta n'escena munches veces ayuda y que s'agradez ver a un grupu de música dándolo too enriba l'escenariu, seya asturianu o non. L'otru día tuvi viendo a Xera, que nun los viera en direuto, y daba gustu, la verdá. Pero tamién ye verdá que depende'l tipu de música asturiana qu'ufiertes. Tuenda, por exemplu, nun necesita más interpretación que les ganes que te tresmiten de ponete a baillar o cantar; o Felpeyu, el mio grupu preferíu, que la so música y les sos lletres son suficiente pa namorate.

 

-Vamos acabando, pero pa siguir de dalguna forma sabiendo más de ti, gustaríame que nos recomendaras una película de cine y una obra de teatru.

   Una película, "Rebeca" d'Alfred Hitchcock; una obra de teatru, "La dama del alba" del asturianu Alejandro Casona; y una serie a parte de les imprescindibles y mítiques "Breaking Bad" y "Juego de Tronos", "Roma criminal".

 

-Flavio Benito, el Maestru Gaiteru, dexó una entruga pa ti ensin saber que yeres tu: “¿Pa qué val una banda de gaites?”

   Una banda gaites ye la hipérbole d'un gaiteru, y por tantu l'enfasis de la cultura asturiana dende ún de los sos puntos más notables, la música. Dexar Asturies ensin bandes de gaites, sedría como quita-y la so banda sonora.

 

-Entós tócate a ti formular la entruga a ciegues...contestarála’l próximu entrevistáu (si podemos nomalu asina). ¡Munches gracies y hasta la primera!

  ¿Cuál ye'l son que más te presta sentir tocáu por una banda gaites?